تنويه: كل الاسماء الواردة تحت القصص هي أسماء وهمية بغرض حماية الحياة الشخصية لأصحاب القصص الحقيقية

اذا حابب تنشر قصتك من فضلك راسلنا من هــنــا winkونضمن لكم سرية الخصوصية الشخصية

ads

Home » » المرض قهرني

المرض قهرني





انا مشكلتي ممكن تكون صعبة شوية.. بس هقول و املي فيكوا كبير انكوا تلاقولي حل فيها 
انا من و انا عندي 18 سنة بدات حياتي من بنوتة في ثانوية عامة نفسها تخش كلية الطب لانها فعلا تستاهل.. بنت مليانة امل و تفاؤل و طاقة.. مببطلش لعب كنت بلعب جمباز! .. مش بقعد هادية.. دايما انضف البيت و انزل اقضي طلبات البيت و كنت بغني.. و بلعب كمانجة.. عمري مزعلت حد مني ولا عمري ظلمت حد لاني عايشاها ببساطة.. حتي لو حد ظلمني بقول معلش بكرة يتعلم.. 
لحد سنة الثانوية العامة بتاعتي كان كله حاطط امله فيا و انا كنت واثقة في نفسي ثقة عمياء.. بدا مجهودي يقل.. مبقيتش اقدر اعمل التسخين اللي قبل التمرين.. واحدة في واحدة مبقيتش اقدر اطلع سلم.. و لما اغصب علي نفسي اقع و يغم عليا.. كشفت عند دكتور و 2 و 3 و كلو بيقول انيميا و سوء تغذية! .. و صرفت دوا كتير اوي ع الحوار دة بس مفيش فايدة.. قولت معلش هبقا اطلع السلم بالراحة مش لازم اجري.. مبقيتش اقدر امشي في الشارع.. بنهج و بيغم عليا.. شفايفي بقت زرقا و وشي بقا غامق مع ان بشرتي بيضا.. مبقيتش اقدر اطلع من اوضتي للحمام.. بيغم عليا في النص بحس اني بجري بقالي سنين! و حصل المووضوع دة وسط الامتحانات.. نص الامتحانات تعبت فيها و اللي نجحت فيه كنت يادوب وصلت لنص الامتحان و نجحت او ملحقتش اكمله قبل ما يحصلي الاغماء.. و عديت بالعافية! اهلي كلهم كانوا ضدي و كلو كرهني انا شخصيا كرهت نفسي لان كل الدكاترة بيقولوا انيميا و خلاص بقيت انا الكدابة و انا اللي بتدلع.. عملت معادلة و دخلت كمبيوتر ساينس.. في الترم الاول في الامتحانات كنت قاعدة بذاكر عشان الفاينل.. و الشبابيك مفتحة و المروحة جنبي و مش قادرة اتنفس.. روحت لدكتور قلب.. قالي انتي ماشية علي رجليكي ازاي؟ .. و من هنا بدات حياتي تتقلب 
عندي تمدد في البطين الايمن في القلب و ارتجاع في الصمام الثلاثي.. و الاهم من كل دة.. تمدد في الشريان الرئوي.. و هي دي الحاجة الوحيدة اللي ملهاش علاج! 
روحت لدكتور في القاهرة اسمه مدحت عبد الخالق.. قالي كلام زي السكاكين بس يا سبحان المثبت كنت باخد منه كل كلمة بابتسامة مبتختفيش.. ماما كانت مذهولة و اظن انها كانت بتفكر هتعمل عزايا فين.. 
تمدد الشريان الرئوي هو المسبب لكل دة فبالتالي هو اللي لازم يتعالج.. او حتي يتسكن! 
و كنت متقبلة اني اتحكم عليا اني لو حد قبل يتجوزني مش هقدر احمل.. مش هقدر العب رياضة تاني.. ولا هعرف اغني تاني عشان نفسي بقا قصير هههه.. مطلوب مني الراحة التامة عشان الشريان ميتمددش تاني و الضغط فيه يزيد.. و كل دة مع علاج تمنه في الشهر 30 الف جنيه.. 
يا حضرات انا سمعت التمن دة و هيستيريا ضحك مش طبيعية لدرجة اني بدات ادوخ و كان هيغم عليا.. فروحت ساكتة 😂 
قولتله حد قالك اني سارقة بنك ولا ابويا وزير! ولا انا كنت شغالة رقاصة و اعتزلت.. يا دكتور بتقول ايه بس! .. الدواء اسمه Tracleer 125.. قالي خلاص خدي المصري و دة تكلفته 3400.. قولتله حلو دة اهو كدة حاجة معقولة نقدر نجيبها.. قالي بس اعراضه الجانبية كتيرة و الجسم بيتعود عليه و واحدة في واحدة مش بياثر تاني.. الدوا دة معاه مكملات تانية بخش علاج بس في الشهر 4800.. مكنتش عارفة اعمل ايه.. كل شهر المبلغ دة مش شوية.. و كمان مصاريف كليتي! عديت الترم التاني و بدات اشتغل كول سنتر بال 13 ساعة اوفر تايم و ماما بتساعدني من الناحية التانية باللي تقدر عليه.. بس فعلا الدوا خلاص مبقاش ياثر و رجعت اتعب تاني.. بقت حياتي عبارة عن شغل من 8 الصبح لحد 9 بالليل.. و ارجع انام عشان اصحي الساعة 5 الفجر عشان الحق الباص بتاع الشغل الساعة 6:20 الصبح.. جه واحد قال لماما و اقنعها انه يقدر يجيب العلاج علي نفقة الدولة.. و اخد فلوس كتير حوالي 10 الاف.. عشان يجيب القرار دة.. و مشينا في السكة دي و روحت المراكز الطبية المتخصصة في الحي السادس ووطلعت القرار.. و روحت معهد ناصر عشان اصرف العلاج قالولي مش موجود.. و الحالة الوحيدة اللي نقدر نصرف فيها العلاج دة انك تكوني محجوزة.. و هيغطي 600 جنيه بس مش العلاج كله! ممكن نوفرلك الكمية كلها بس ادفعي! 
لما رجعنا للراجل تاني قال معرفكوش ولا عمري شوفتكوا! و الدكتور لما رجعتله قالي كدة انتي اخدتي وقتك مع الدوا المصري اللي انا بنحت في الصخر عشان اجيبه.. و واحدة واحدة مش هياثر تاني معاكي.. اللي مش عارف حاجة عن الحالة دي اكتب في جوجل مرض ارتفاع ضغط الشريان الرئوي.. 
علاجه مادة البوسنتان.. 
المصري من المادة دي اسمه pulmiprove125 
و المستورد اسمه tracleer 125 
و الدوا ولا هو موجود في التامين ولا حتي في اي مستشفي حكومي و لو مش مصدق اسال بنفسك 
انا مش عايزة المستورد.. انا عايزة ع المصري و لو حتي اي تغطية عليه مش كله مجانا و ساعتها هقعد من الشغل و هعرف اتنفس و انا نايمة 
شوفتوا بقا.. من واحدة عندها 18 سنة كانت عاملة ازاي و احلامي كانت ايه و دلوقتي بقا اقصي طموحاتي ايه؟.. اني اعرف اتنفس! مش اكتر 
متاسفة علي الاطالة بس فعلا انا مزودتش كلام كتير من فراغ 
ملحوظة مهمة انا لست صاحب المشكلة 
من اراد مساعدة الفتاة أستطيع ايصاله بها شكرا  

  رؤى 



0 comments:

إرسال تعليق

حمل التطبيق

حمل تطبيق احكيلي

Facebook

 
Created By SoraTemplates | Distributed By Blogger Template