تنويه: كل الاسماء الواردة تحت القصص هي أسماء وهمية بغرض حماية الحياة الشخصية لأصحاب القصص الحقيقية

اذا حابب تنشر قصتك من فضلك راسلنا من هــنــا winkونضمن لكم سرية الخصوصية الشخصية

ads

Home » » جوزي بحب غيري

جوزي بحب غيري




مش عارفة ابدء مشكلتي منين
كنت بنوته جميلة و من اسرة متوسطة تعبت اوي في حياتي لحد ما حققت جزء كبير من احلامي و اتعينت
في مكان مرموق و اشتريت عربية و الدنيا ماشية ، شافني محمد وانا بشتغل في نفس اليوم وصل للرقم بابا و طلب يتقدمللي
اتخطبنا و عمل حاجات كتير عشان اتعلق بيه و فعلا حبيته ، حبيته جدااااا خطوبتنا مكانتش رائعه بس كان باين فيها اوي اني متمسكة بيه و اني عايزة اكمل معاه ، رغم رفض اهله ليا و كرههم فيا بس هو كان بيعمل حاجات تحببني فيه
وقفت جمبه كتير من حبي فيه ، حتى و احنا بنأسس بيتنا شيلت من عليه معظم الحاجات اللي اتفق عليها مع بابا من غير ما اقول لحد اني انا اللي دفعه
المهم اتجوزنا و مافيش شهرين حملت و حياتنا كانت حلوة الحمد لله خلفت بنوته زي القمر شبهه جداااا ومر ١١ شهر على ولادة بنتي ، و فجأة اتغير ٣٦٠ درجة بقى بارد و مشاعره فاترة و مهمل فيا و في بيته و بنته لأبعد الحدود و بقى بيتلكك عشان يفضل برة البيت اطول وقت ممكن و بقى يخاصمني من غير سبب و ينام في اوضة لوحده بالشهور و كل ما اكلمه يزهق و يتنرفز و يسيبني و يمشي انا كمان بقيت عصبية جدا معاه و بتعصب جدا و اغلط ومش فاهمه ليه بيعمل كده ، استمر الحال ده حوالي ٤ شهور و كل اللي على لسانه ابعدي عني انا بكرهك و عمري ما حبيتك المهم طلبت الطلاق قاللي معنديش مانع قولتله طب ممكن تساعدني اخلف تاني
كنت عارفة اني حياتي بعده انتهت وقولت عمري يضيع في تربية الطفلين احسن ما يضيع على بنوته واحده تعيش عمرها كله نفسها في اخوات ، كان بيقرب مني كأني حشرة مش طايق يلمسها كان بيعاملني كأن حمل تقيل نفسه يخلص منه ،وفعلا حملت ويوم ما عرفت اني حامل طلقني ، كنت شاكة ان التغيير ده سببه حد تاني في حياته بس هو كان بينكر
المهم بعد كام يوم من الطلاق حليت في عينيه و بدئنا نتكلم تاني ، طلبت منه نروح دار الافتاء عشان نرجع لبعض و روحنا و طلع من عند الشيخ قاللي للاسف ملهاش مخرج و ديه الطلقة التالته ، انهرت عياط لما كنت هموت وهو محملني مسؤلية اللي حصل كله
مافيش كام يوم و البابي اللي في بطني مات و نزل لوحده ، و ساعتها اكتشفت انه على علاقة ببنت في ثانوي هي السبب في كل اللي عمله فيا
اتصدمت جداااا فيه بس هو بقى يترجاني اسكت و ان في شيخ كويس هو يعرفه هيرجعنا لبعض و انه هيسيبها عشاني و مرت الايام و انا في بيت اهلي مستنياه يسيبها و مستنية الشيخ اللي هيرجعنا لبعض
مرت شهور و هو بيسجدني عشان مقولش لحد و اطلب ورقة الطلاق رسمي
كان كل ما يلاقيني نسيته و هديت كان يرجع تاني و يقرب و يحاول يفكرني بيه
عدت ٦ شهور و انا في بيت اهلي لا بيبعت لنا فلوس ولا بيفكر حتى يشوف بنته ، لحد ما كلمت بابا و قولتله ييجي يديني ورقة الطلاق
المهم طلب ساعتها يتكلم معايا واعترف انه مطلقنيش للمرة التالته ولا حاجه هو قال كده عشان محدش يطلب منه يرجعني و عشان اهل البنت يطمنوا لما يعرفوا انه مطلق ٣ مرات ومافيش امل يرجع و قال انه مسألش اصلا في الافتا لانه مطلقنيش
وقاللي هتغير و انتي كمان تتغيري و اعتبري موضوع البنت التانية انتهى
و انه سأل مشايخ و قالولوه اني لسة على زمته
و رجعت و اتغيرت للاحسن و أدت صوابعي شمع عشان يرضى و بدء يتغير شوية للاحسن ، معداش ايام و اكتشفت انه لسة على علاقة بنادين و بيقولها انه ميهمهوش حد يعرف انه بيحبها وان كل اللي حواليه عارفين انه بيحبها و عايز يتجوزها ، جبته وواجهته و وطي على رجلي باسها و قاللي انه بيحاول يسيبها بس مش سهل كده و انها متمسكة بيه جدااا
و اقتنعت و رجعت و حلف انه سابها و اني رجعت لمكاني في قلبه
و فضلت اعامله والله احسن معامله كأنه ملك و كأني جارية بتمنى رضاه واقول لنفسي حتى لو مش بيحبني كفاية ربنا هيرضى عني و يجازيني اجر الصبر و الاحسان و بكره هيحبني ، يمكن لما ابقى زوجه مثالية يتغير و يحس انه ظلمني
حملت تاني و فرحت جداااا بالحمل ده ، وعدى ٣ شهور و حصللي مشكلة وجالي نزيف حاد و الدكتور طلب مني راحة تامة و معملش اي حركة وقتها صمم اني اعد في بيت اهلي اعدت اسبوع و رجعت بيتي عشان اعمله مفاجأه
و ساعتها اكتشفت انه مسابش البنت و ان علاقتهم في زيادة على امل انها لما تتخرج من الجامعة كان هيسيبني و يجوزها
لما عرفت بكى جامد و اتوسل انه عرف قيمتي و انه خلاص معدش بيحبها و انها متستاهلش انه يدمر حياته عشانها
سامحته بعد محايلة و بعدها بأسبوعين برده لاقيت رقمها عنده سكت و قاللي هي اللي طلبتني و انا اساسا نسيتها ، و عدى شهرين و اخدني و سافرنا نغير جو و برده كلمها ساعتها زهقت و طقيت وقولتله كده كتير بقى عمالة اسامحك ومافيش فايد، سبت البيت يومين و بعدها بدء يقوللي بوضوح انا هتجوزها و اعمللي اللي انتي عاوزة و مش هطلقك عشان العيال ، عشان متقوليش لولادي اني طلقتك و انتي حامل
دللوقتي هو مشي و ساب البيت و بقاله اكتر من شهر لا شاف بنته و لا بعتلها فلوس و لا سأل عني و لا عن اللي في بطني
من كتر الزعل جاني جلطة و كنت هموت ، و قولتله و مهتمش
هو داللوقتي عايش حياته معاها و الله اعلم علاقته بيها واصلة لفين و عمال ينزللها بوستات ع النت انه بيعشقها و ان مافيش انثى على الارض غيرها و انه ماشفش ست قبلها
واهله فرحانين بيه و بيقولوله اوعى تطلق مراتك خليها على زمتك عشان العيال و انساها و اتجوز و عيش حياتك
السؤال هنا هل ده حلال
هل ده شرع ربنا فعلا انه يعيش حياته و يعلقني كده و انا اقسم بالله ما قصرت معاه في حاجه
مش اللي بيحصل ده ظلم
امانه عليكوا تدعولي
والله ما كدبت عليكوا في كلمة

ام سلمى 

0 comments:

إرسال تعليق

حمل التطبيق

حمل تطبيق احكيلي

Facebook

 
Created By SoraTemplates | Distributed By Blogger Template